Эрхэм хүндэт Турк Улсын иргэд ээ,

Эрхэм хүндэт Монголын анд нөхөд өө,

Миний бие Бүгд Найрамдах Турк Улсаас Монгол Улсад суух Элчин сайдын үүрэгт ажилдаа 2021 оны 4 дүгээр сарын 12-ны өдрөөс эхлэн ороод байна.

Эртний түүхэн холбоотой Монгол Улсад ажиллах нь нэр төрийн хэрэг бөгөөд үүнд туйлын баяртай байна.

Найрсаг Монгол Улс 2011 онд баталсан гадаад бодлогын үзэл баримтлалдаа манай улсыг “Гуравдагч хөрш” хэмээн тунхагласан билээ. Энэхүү бодлогын хүрээнд Монгол Улстай бүхий л салбарын харилцаагаа улам өргөжүүлэн хөгжүүлэх нь миний албан үүргээ гүйцэтгэх хугацаанд хэрэгжүүлэх ажлын маань гол зорилго байх болно.

Монгол Улсад түүхэнд дурдагдсан хамгийн анхны Түрэгийн гурван төрт улсын нийслэл хот байсан бөгөөд түүхийн маш олон баялаг, дахин давтагдашгүй дурсгалын өв одоог хүртэл хадгалагдан ирсэн. Түүхэнд эртний турк цагаан толгойгоор бичигдсэн, “Түрэг” болон “Түрэг үндэстэн” хэмээх үгс анхлан дурдагдсан хадны бичээсүүд Монгол Улсын нутаг дэвсгэрт байдаг. Монгол Улстай нийтлэг түүх, соёлын улбаатай эдгээр дурсгалуудыг хадгалж хамгаалах, таниулах нь бидний тэргүүн зорилтуудын нэг билээ. Энэхүү зорилтдоо хүрэхийн тулд Монголын холбогдох байгууллагуудтай хамтын ажиллагаагаа улам хөгжүүлнэ хэмээн найдаж байна.

Сүүлийн жилүүдэд 30 – 40 сая ам.долларт хүрээд буй худалдааны эргэлт бодит боломжоос тун бага байна. Энэхүү боломжийг ашиглаж, хоёр орны хоорондох худалдааны харилцааг илүү өндөр түвшинд гаргахын тулд хичээн ажиллах болно.

Туркийн иргэд болон Монгол анд нөхөддөө үзүүлдэг консулын үйлчилгээг илүү чанартай, түргэн шуурхай, 7 хоногийн 24 цаг хүргэдэг болох нь нэн тэргүүний зорилтуудын нэг байх болно. Энэ хүрээнд, та бүхний санал хүсэлтийг нээлттэй хүлээн авна. Бүх үйл ажиллагаа, мэдээ мэдээллийг шуурхай хүлээн авахын тулд Элчин сайдын яамны нийгмийн сүлжээний хуудсуудыг ( цахим уудас, Facebook, Twitter) дагахыг зөвлөе.

Энэхүү завшааныг тохиолдуулан эрхэм хүндэт Турк иргэддээ болон Монгол ахан дүүстээ Элчин сайдын яамны хамт олны нэрийн өмнөөс болон хувиасаа хамгийн сайн сайхныг хүсэн ерөөж, хүндэтгэлээ илэрхийлье.

Зафер АТЕШ

Элчин сайд